انا قبل مسافر بخيالى
على ضوء الشمس
كنت انا مكبوت بتمنى الموت
والصرخه فى قلبى مدويه
بتهز اركان السكوت
قطر الزمن عمال يفوت
بيعدى بتقله على كتافى
بيمرر حلقى
بيحطم زاتى
وبمشرط بارد بيجرح
فى غناوى الفرح
وبصوته العالى يشق الصمت
وياخد منى اعز الناس
متغرب انا فى بلادى يا ناس
والغربه تموت فى الاحساس
الرحمه اتعدمت واتردمت
والحق ملوش ولا اى اساس
متغرب انا فى بلادى يا ناس
**********************
دلوقتى خيالى سرح بيا
ودانى بعيد
ودانى فى طياره عقلى
لبلاد العيد
مليانه بحب وجرح مفيش
مليانه افراح والحزن مفيش
فى جمالها بيتهيالى مفيش
لففنى خيالى وورانى
حسسنى بروحى ووجدانى
فكرنى باسمى وعنوانى
نسانى الحزن وشكل الدم
نسانى بكا الاطفال والهم
وفضلت انا طاير ومرفرف
بجناحى الابيض ومهفهف
شايف من فوق الوان الوان
ورانى بنات فى جمالهم مين
ضحكتهم تسعد اهل الارض
ووشوشهم زى النور
وجمالهم شبه بنات الحور
حسسنى خيالى بحريه
ورانى الخوف ازاى ينداس
علمنى العدل بايه يتآس
وساعتها بقيت مرفوع الراس
***********************
على فجاءه صحيت م الوهم
ورجعت بلاد الهم
انا شفت بعينى المحروسه
واقلامها الحره المحبوسه
والحبر السايل على نيلها
والقهر البايت فى نخيلها
والكدب مغرق اراضيها
اه يا ارض الخوف يا خوف الارض
مليانه خراب بيهد المجد
والكلمه الاولى بقت للظلم
والحق المبنى اللى بيتهد
ووشوش الناس مليانه شحوب
م الدمعه المره العين بتدوب
ورجعت اتمنيت الموت
ومفيش ولا صوت
بينادى يقول اصرخ يا سكوت
الناس اللى ابكم واللى اصم
من طعم الزل وطعم الهم
بدايتنا بدايه نهايتنا
نهايتنا بقت زى حكايه
حكايات حكايات
يا بلد حكايات.......