لو مكانهم تعملوا اية......واية رايكم في الموقف دة ؟؟؟

السلام عليكم
الموضوع دا انا شفتة بيحصل قدامي كتير ومش ببقي عارفة الحقيقة اعمل اية لان الواحد ساعات مش بيكون متاكد من اللي شايفة
فهقولكم وانتوا قولولي تعملوا اية لو في الموقف دة ؟؟؟


نفترض مثلا
بنت معجبة بواحد جدا بس مكسوفة تقولة علشان اصحابها بيقوللها ازاي هو اللي يجي عاملية وحش علشان تكوني تقيلة
وياعيني البت تسمع الكلام وكان دماغها مش موجودة بس ماعلينا
وتعامل الواد برزالة فظيعة وتبص بقرف بقي
والمشكلة ان الواد كان هو كمان معجب بس طبعا اصحابة قرروا يساعدوة ويقولوة لالا هي بتتقل يبقي اتقل انت كمان بعد اما اصحابها نيلوا الدنيا وخلوها تعاملة وحش خالص يقرروا اصحابة ينصحوا هما كمان قال يعني الموضوع مش بايظ كفاية ويتحول الامر لانة لو رحلها يبقي بيضعف وماينفعش

وفي النهاية الاتنين يبدوا يفسروا التصرفات غلط خالص ويقرروا انهم مش لبعض بقي ونبعد احسن
والمشكلة الاتنين يكونوا كان معجبين بس طبعا علشان فكرة اتقل علية او عليها علشان تقرب اكتر الموضوع يبوظ خالص


قولولي بقي انتوا اية رايك وهل الاصحاب كان تصرفهم صح طبعا مع فرض ان بجد نيتهم كويسة ومش قصدهم حاجة واية التصرف اللي كان لازم يتاخد من الاول ؟؟؟

موضوع جميل بينك
بس مش دايما يبقى كلام الاصدقاء هو الى المفروض يتنفذ
احيانا ناس كتير اوى من كتر حبهم لينا ممكن يحرمونا من احلى احلامنا لمجرد الخوف ده
بس اكيد طبعا هى ليها عقل تفكر بيه مش كل مشاكلها ترميها على اصحابها
وطول ما بتتقل اوى كده بتضيع حبييها من ايدها
وفى مثل بيقولك (مش تتقل على الارز لا يشيط(

شكرا لي لي انا معاكي والله
بس انت من رايك كانت اية التصرف اللي يحصل من الاول خالص من تجاهم برة اصحابهم

وشكرا علي ردك

الف شكر لي لي علي التثبيت
بجد شكرا ليكي

مشكورة يا binkعلى الموضوع الجامد ده اللى هينفع بنات وشباب كتير

وهبتدى بتعقيب فى الاول على كلامك وبعدين هقول رايى

1-بنت معجبة بواحد جدا بس مكسوفة تقولة علشان اصحابها بيقوللها ازاي هو اللي يجي عاملية وحش علشان تكوني تقيلة .
اولا التقل مش معناه انى بعامله وحش وابقى معاه رخم
التقل معناه انى مبصرحش بمشاعرى وبللى بحس بيه او بيكون التصريح دا بحجم معين يعنى بيبقى رد على كلامه هوه مش اكتر

2- والمشكلة ان الواد كان هو كمان معجب بس طبعا اصحابة قرروا يساعدوة ويقولوة لالا هي بتتقل يبقي اتقل انت كمان بعد اما اصحابها نيلوا الدنيا وخلوها تعاملة وحش خالص يقرروا اصحابة ينصحوا هما كمان قال يعني الموضوع مش بايظ كفاية ويتحول الامر لانة لو رحلها يبقي بيضعف وماينفعش .
ازاى لو رحلها يبقى بيضعف ومينفعش وهوه كده كده هوه اللى هيروح سواء فى الاول او الاخر هيروحلها
لان عمر البنت ما هتصرح باعجابها لشاب
ودا كنا ناقشناه فى موضوع تانى اللى هوه ان المفروض يكون البنت عندها حياء وتسيبها من اى كلام يشوش على تفكيرها ويلخبطها اكتر ما هيا متلخبطه خلقه

الشباب طبعا فى المواقف دى كل واحد منهم بيفتح صدره ويعمل فيها ابو العريف او ابن بطوطه اللى لف العالم ومقطع السمكه وديلها ومفيش بنت تقف قدامه وكل الامور عنده سهله وطبعا الضحيه مش عارف حاجه واول مره بنت تعجب بيه وعامل فيها التلميذ الفصيح وقاعد بقا مركز مع صاحبه اهو ياخد فكره ويشترى بكره .
والبنات بقا يا عينى يا ليلى يا نهار ملوش وش كل واحده منهم تعمل فيها ابله ظاظا والقطنه مبتكدبش ودخلت القطنه الجنه
كل واحده تعمل فيها انها ايه الشباب مبيبطلوش معاكسه واعجاب والبت الراسيه التقيله الناصحه وتبص فى عين الواد من دول تلخبطه علطول وتجيب الواد على وشه هوا
وطبعا الضحيه التانيه برده اول مره تعجب بولد ومش عارفه تعمل ايه وتفتح مخها مع صاحبتها ابله ظاظا وتقعد بقا تسمع وتاخد وتنفذ بدون تفكير ويسلام لو صاحبتها طلع فى كلامها حاجه صح تعمل فرح وانا مدوباهم اتنين ومفيش ولد يقف قدامى .

نتكلم جد بقا شويه
المشكله فينا احنا لا فى اصحابنا ولا الموقف
احنا دايما بنعمل من الحبه قبه وبندى المواضيع اكبر من حجمها
الاعجاب مش بيان هطلع اقوله فى التليفزيون
الاعجاب مش كلمه وبس الاعجاب بيبان فى كل حاجه من الطرفين من نظره من ابتسامه من اهتمام فوق العادى
وبعدين انا لازم اركز هل الطرف التانى دا هوه كمان بيبادلنى نفس الاعجاب ولا لاء
والاعجاب بيوصل بخمسين طريقه ممكن من النظره او الابتسامه
اهم حاجه انك تفكرى بعقلك انتى وتشوفى انتى عايزه ايه وسيبك من حكاوى القهاوى اللى شغاله على ودنك فى الكليه وفى التليفزيون والبيت والشارع والتليفون
انتى بينك وبين نفسك معجبه بالشخص دا حاولى تلفتى نظره بكده لكن مش معنى انك تلفتى نظره انك تقوليله وتصارحيه لانه مش هينفع ان بنت تصرح باعجابها لشخص
وتشوفى بقا الشخص دا معجب ولو لاء ولو معجب هل خد باله ولا لاء
لو مخدش باله حاولى تتجاهليه ومتحسسهوش انك شايفاه من اساسه (ودا اللى اسمه التقل )
هتلاقيه جالك علطول وصرح باعجابه لانه حس انك بتضيعى منه

وحاولى على قد ما تقدرى انك تحددى مين من اصحابك اللى بيفكر بحكمه مش كل واحد يسمعلك ويديلك رايه يبقى كويس
لانه ممكن يكون محسسك انه مارر بتجربه واتنين وتلاته وهوه ولا عمره حس يعنى ايه اعجاب وحب
وعمره ما هيديلك المعلومه الصح

وحاولى على قد ما تقدرى تبقى مختلفه عن المالوف واللى بيكون متبع فى المواقف دى
فى حاله تصريحه بالاعجاب والموضوع تتطور لحب بلاش بقا نبقى رخمين وغلسين ونبطل بقا التقل والقرف دا
كل واحد يحب التانى بجد ويخلصله من قلبه واللى فى قلبك خليه على لسانك مش لازم يعنى الطرف التانى هوه اللى يبدا
مش معنى كلامى دا انى اعطى بدون مقابل لان الحب دا علاقه تكامليه يعنى لازم اخد عشان ادى
انا اللى اقصده فى حاله ان الطرف التانى اللى معايا بيحبنى بجد ولو طلبت نجمه من السما هيجبها متقلش بقا واخبى لا اقوله على كل حاجه واناقشه فى كل حاجه ومش معنى اناقشه انى اجادله لاء تبقى مناقشه بسيطه ومقنعه عشان يبقى فى تفاهم بينكم قبل الارتباط حتى يستمر التفاهم بينكم بعد الارتباط

ملحوظه الكلام غير موجه بصفه شخصيه لاحد لانى عارف ان الواضح من كلامى انه موجه بطريقه شخصيه
انا عارف انى كتبت بيان مجلس شعب مش رد
لسه جاى من السفر بقا واول موضوع بستفتح بيه
اتمنى اكون جاوبت على سؤالكم بطريقه هادفه ومقنعه
تقبلو مرورى وتحياتى

انتى بينك وبين نفسك معجبه بالشخص دا حاولى تلفتى نظره بكده لكن مش معنى انك تلفتى نظره انك تقوليله وتصارحيه لانه مش هينفع ان بنت تصرح باعجابها لشخص
وبعدين
ملحوظه الكلام غير موجه بصفه شخصيه لاحد لانى عارف ان الواضح من كلامى انه موجه بطريقه شخصية

شكرا علي رايك
بس بجد مش انا اللي كدة لو انا انا كنت هقول وبذمتك بعد اما تقول انتي بينك تقول مش موجة بطريقة شخصية

انا اولا شخصيتي في نواحي كتيرة قويةالحمد لله لذلك مش بسمع كلام الناس زي الهبلة في اي موضوع لازم استخدم عقلي لذلك مش ممكن يكون انا


ثانيا بقي تعليق علي رايك
انا فعلا معاك ان الواحد لازم يشغل عقلة ومش يسمع للناس وبس وانا كان قصدي بجد من الموضوع ان انبة اي فرد واقع في المشكلة دية الي انة بلاش سماع الكلام من غير التفكير اللي بيحصل وبالذات في المواضيع دية

الف شكر علي مرورك هتسيبني

مشكوره على ردك واهتمامك
انا كتبت الملحوظه دى عشان محدش يفهم ان ردى دا موجه ليكى بصفه شخصيه انا كنت بكلم اى بنت تقرا الموضوع بصفه عامه
لكن قصدت اوجه الكلام بصيغه المؤنث عشان اى بنت تقرا الرد تحس انه موجه ليها

تقبلى مرورى

شكر اليك انت علي اهتمامك بالموضوع
وعادي انا مزعلتش بس حبيت اوضح للناس بس مش اكتر
شكرا لمرورك واكيد قابلة مرورك

جميل موضوعك يا بينك انا من راى الى بيحب بيبان عليه من كلامه واسلوبه واحساسه وممكن يتكلم مع اصحابه بس يعترف بمشاعره عشان الى بيحب بيبان عليه من كلمه من نظره ويتكلم مع صديق ليه هو بيكون حاكيله كل حاجه عنه ويفكر فى رايه قبل ماا
تسلم على موضوعك

شكرا كرملك علي المرور