هو انا اللي هغير الكون

لا اله إلا الله الحليم الكريم .... لا اله إلا الله العلى العظيم .... لا اله إلا الله رب السماوات السبع ورب العرش العظيم

شكرا ضي ع المرور نورتي بس انا شايفه ان كل واحد يبدأ يصلح نفسه الاول ولما نعمل كده مش هيبقي في مشاكل
لا اللي بيقتل مش هيقتل وقتها واللي بيسرق مش هيسرق واللي سرب الامتحانات مش هيعمل كده تاني وغيرها كتير اوي
من الاحاجات الغلط اللي هتتصلح وشكرا عالمرور والتثبيت

جزاكى الله كل خير بلاك روز
موضوع جميل
وهو دة اللى احنا عاوزين نوصله للشباب
ان هم المستقبل هم بكرة
ونعلمهم ازاى عدم الاستسلام
والطموح
وزى ما بيقولوا الطموح والتفكير معلهوش جمرك
ياريت كلنا نفكر ويكون طموح وامل وتفائل
ياريت
بشكرك بلاك روز
تقبلى مرورى

معلشى لمداخلتى للمرة التانية

انا هقول انه لكل شىء بداية
ولكل نهاية بداية ولكل بداية نهاية اما متفائلة وتفرح واما منشائمة ونزعل
معلش يا ضى لو انتى وانا قلنا مش انا اللى هغير الكون يبقى الكون مش هيتغير
لازم يكون فى امل فيكى وفيى وفى كل شاب وكل فتاه
والحقيقة يا جماعة انا ارى انها ليست معادلة صعبة ابدا
والحل موجود بس اللى ينفذوا واحنا فى مصر بالخصوص ناقصنا حاجتين
معندناش ادارة كويسة ومش بنعرف ندير الازمة
وكمان كل واحد معتمد على الاخر

وزى ما قلت لك لكل شىء بداية
الفساد كان له بداية
والاصلاح له بداية
ودة اللى لازم نعرفه
انا هقولكم على حاجة ازعجتنى جدا فى سفينة زى بقية السفن اللى بتاخد الشبان وتسفرهم بهجرة غير شرعية
كل واحد طلع على المركب اللى دفع 10 الالاف واللى 15 و20
لو جمعنا النقود دى مش كانو عملوا مشروع واشتغلو كلهم كان احسن
وكمان عمليات النصب اللى بتتنصب بيها على الناس بملايين
مش لو كان تم توظيفها صح كنا بقينا حاجة تانية
انا اقول انه الازمة عندنا فى الادارة وكيفية ادارة الازمة
وانا اسفة للتطويل
وبشكرك بلاك روز على الموضوع الهام جدا دة

كلامك جميل يا توتا
وحضرتك قولتى
معندناش ادارة كويسة ومش بنعرف ندير الازمة
وكمان كل واحد معتمد على الاخر

يعنى رجعت اتكلم عن الادارة ومين اللى ماسك الادارة ؟؟؟؟؟؟على فكرة انا ضد التشاؤم والتواكل والبكاء والتحسر على الاحداث ولو فى حاجة جادة ومفيدة الواحد يقدر يعملها اكيد مش حتاخر ..ولكن انتى قولتى ادارة سيئة ..صح ..يتبعها ايه ..سلسلة كاملة من الاخطاء ..وسايط ..محسوبيات ..تعيينات بدون كفاءات ..اى ازمة تتحل غلط
طيب بالنسبة لنقطة كل واحد معتمد على الاخر ..دى مش موجودة فى كل الشباب ولان فى شباب كتير مجتهد وطموح وبيعمل مشاريع ويكد ويجتهد والتوفيق من الله سبحانه وتعالى

وكمان بتقولى
انا هقولكم على حاجة ازعجتنى جدا فى سفينة زى بقية السفن اللى بتاخد الشبان وتسفرهم بهجرة غير شرعية
كل واحد طلع على المركب اللى دفع 10 الالاف واللى 15 و20
لو جمعنا النقود دى مش كانو عملوا مشروع واشتغلو كلهم كان احسن
الموضوع ده ممكن ننظر له بطريقتين ..الاولى اللى حضرتك ذكرتيها والثانية هى الخوف من الفشل ولطريقة التعامل فى مصر من ناحية الضرائب واذا كان المشروع حينجح ويجيب تمن مصاريفة وتكلفته ولا لأه ...وكثير كثير من المشاريع بتفتح سنة بالكتير وتلاقيها اتقفلت او اتباعت يعنى مش كل المشاريع نسبة نجاحها مضمونه( وهو مفيش حاجة مضمونه اصلا فى مصر)
طيب ليه الشباب بيسعى دايما للسفر للخارج ..علشان المادة والمكسب السريع ممكن ..علشان اليأس من انه يلاقى وظيفة فى مصر تناسب تخصصه ممكن برده ..علشان يعرف يجهز نفسه ويشترى شقة ويعرف يتجوز ممكن كمان...ولانه يكاد يكون مستحيل ان الشاب الآن يكون نفسه بوظيفة حكومية عادية الا اذا كان حظه رائع واشتغل فى قطاع خاص او شركة اجنبية

طيب نرجع تانى
وكمان عمليات النصب اللى بتتنصب بيها على الناس بملايين
مش لو كان تم توظيفها صح كنا بقينا حاجة تانية
انتى كده قولتى نفس كلامى انا وهو النصب والسرقة والدنيا بقت سايبة واللى عاوز يعمل حاجة بيعملها ..مين بيحاسب..مين بيحاكم ..مين بيراجع..ربنا يستر
وصدقينى يا توتا وبالرغم من كل ده لكنى اتمنى التغيير وعندى تفاؤل ..صحيح مش كبير ولكنه موجود ومش العيب فى الشباب اكتر من ان الرأس نفسها محتاجة لتعديل
شكرا توتا الدسوقى على المتابعة والرد
وجزاكى الله كل خير

black rose كتب:

هو أنا اللي حغير الكون, هي جت عليا أنا, أما مفيش مني أمل..."

أبوة انت اللي حتغير الكون و فيه منك أمل ...

أصل لو مفيش منك أمل و مش انت اللي حتغير الكون مكنش ربنا خلقك و جعلك خليفته في الأرض

" اني جاعل في الأرض خليفة"

أنا عارف ان في أسباب بتضعف ثقتنا في أنفسنا زي ضعف الثقة بالله , تجارب سابقة فاشلة و ضعف الثقة في امكانيتنا....

اوعي تستلم و انت معاك ملم الملوك...

استعن بالله وتوكل عليه...

اوعي تشوف تجاربك السابقة انها فشل خليها مجرد تجربة وعدت واستفيد منها....

حطم سلبيتك ويأسك و خلي في نفسك ثقة لانك جندي من جنود الملك....

و انت حتشوف الدنيا بطريقة مختلفة و حتشتغل بطريقة مختلفة....

, هي جت عليا أنا, أما مفيش مني أمل..."

أبوة انت اللي حتغير الكون و فيه منك أمل ...

أصل لو مفيش منك أمل و مش انت اللي حتغير الكون مكنش ربنا خلقك و جعلك خليفته في الأرض

" اني جاعل في الأرض خليفة"

أنا عارف ان في أسباب بتضعف ثقتنا في أنفسنا زي ضعف الثقة بالله , تجارب سابقة فاشلة و ضعف الثقة في امكانيتنا....

اوعي تستلم و انت معاك ملك الملوك...

استعن بالله وتوكل عليه...

اوعي تشوف تجاربك السابقة انها فشل خليها مجرد تجربة وعدت واستفيد منها....

حطم سلبيتك ويأسك و خلي في نفسك ثقة لانك جندي من جنود الملك....

و انت حتشوف الدنيا بطريقة مختلفة و حتشتغل بطريقة مختلفة....

[/size]

بشكرك ضى على المتابعة
ولكنى شعرت من حوارك بوجود امل ضعيف
وهنا يجى دورنا كشباب اننا نقوى الامل دة لحد ما يتحقق بأذن الله
وفعلا احنا كلامنا متشابهه


وانا عاوزة اقولك انه احنا لو خفنا يبقى نقعد فى بيوتنا وخلاص
ونسلم امرنا للى بيعرفو يستفيدوا مننا ومن طاقتنا
واهم حاجة برده ودى مش موجودة عندنا روح المغامرة
وايه يعنى اجرب مرة واتنين وتلاتة ومائة والف كمان لو حبيت
بس المهم انى اتعلم من اخطائى
كمان موضوع الضرايب اعتقد انه بقى اسهل من الاول وفى ناس كتير بتلزم بالاقرار الضريبى ودفع الضرائب
دة قانون ولازم نحترمه والقانون دة مش عندنا احنا بس لا دة موجود فى بلاد كتير
بس الفرق ان هم عرفو يديروا كويس واحنا لا

انا عاوزة اقولك انه حتى لو انتى من جواكى حسة بأمل ضعيف لازم تقويه علشان تحققى حلمك
لازم ننسى الموجود واللى حاصل ونبطل نقول دة حصل امتى وازى احنا ادام ازمة حقيقة ولابد من وجود حل لها
ونفكر ازاى نحلها

زمان كسب عبد الناصر الثورة فى ظل الحتلال والظلم والطغيان ولم يستسلم او يخاف من نتائج دة
ازاى وصلت مصانع عز للمجد والعظمة اللى هى فيه دلوقت وان الاستاذ اللى انا ارى انه عبقرى الاستاذ احمد عز يستحق منا كل الاحترام والتقدير

نبطل كسل وتفكير فى امبارح وانهاردة تعالو نبص لبكرة بعيون تانية
ونشوف بلدنا بكرة احنا هنوديها فين

وانا اسفة للاطالة

شكرا توتا الدسوقى على ردك الجميل
وحضرتك بتقولى
انا عاوزة اقولك انه حتى لو انتى من جواكى حسة بأمل ضعيف لازم تقويه علشان تحققى حلمك
لازم ننسى الموجود واللى حاصل ونبطل نقول دة حصل امتى وازى احنا ادام ازمة حقيقة ولابد من وجود حل لها
ونفكر ازاى نحلها

عارفة مش المشكلة فى حلمى انا أو ما أتمنى تحقيقه وذلك لان احلامى بسيطة ولا تحتاج لمعجزات وتحديات ولاى حاجة من دى بس أنا مش ببص لحلمى بس ..ولكنى انظر للأمام يعنى حقولك حاجة بسيطة بعد مهزلة الثانوية العامة وتسريب الامتحانات وصعوبتها وحبس مدير المدرسة ورئيس اللجنة ..عارفة انا انظر لاخى الصغير وااقول فى نفسى هل حيجى عليه اليوم اللى يبقى زى الطلبة اللى بتبكى بدل الدموع دم ولا لقدر الله زى الطلبة اللى انتحرت ..لو عليا انا ما انا خلصت الثانوى وخلاص ولكنى بنظر على اخى يا ترى مصيره ايه؟؟هل التعليم حيتعدل ويرجع فيه الامانة "ومن غشنا ليس منا " ولكن حنكون فى النازل ..انتى بتقولى روح المغامرة ..يا توتا لو عليا انا الامر سهل جدا وانا الحمدلله مش بيأس من حاجة وبقولك عندى تفاؤل صحيح مش كبير ولكنه موجود ولكنى اخاف على ابى وأمى من اللى جاى ..هل تسمعى عن اخطاء الاطباء؟؟مهازل ..والله يا توتا انى اخر مرة وانا عند الدكتور مع والدتى كنت عمالة ااقول فى سرى "يارب يا رب يكتب الدواء صح ..يا رب يارب يكشف صح"تخيلى وبقيت ادعى ان ربنا يديها الصحة ولا نحتاج للدكتور وللدواء اللى هو كاتبه ..شفتى اد ايه الثقة بدأت تنعدم ..وعلى اى حال أتمنى ان يكون المستقبل أفضل للأطفال والشباب ولكل الناس يارب
شكرا توتا وربنا معانا كلنا يارب
وجزاكى الله كل خير