فتــــــــــــاه النت

( فتاة النت )

الابطال

مازن

مى

كريم
الحلقه الاولى

الاحداث
مازن شاب مستهتر كل حياته على النت بس دايما اصحابه يشتغلوه ويعملو انهم بنات ومبقاش يثق فى اى حد يكلمه على النت وبدات قصته .........

مازن: انا زهقان اوى ومش لاقى حاجه اعملها اما ادخل اشيت بنت اهيه بس يارب متطلع اشتغاله

مازن: هاى ممكن نتعرف

بنوته: لاء مش ممكن

مازن: ولما هوه مش ممكن بترودى ليه وداخله اصلا على الشات ليه

بنوته: علشان اتكلم مع صحابى البنات

مازن: طيب محنا ممكن نبقى اصحاب

بنوته : ليه هوه انت بنت

مازن: لاء ولد

بنوته : اسفه انا مبكلمش اولاد

مازن: طيب جربى كده يمكن اطلع كويس هوه انتى اسمك ايه؟

بنوته : انا اسمى مى

مازن: انا مازن وعندى 22 سنه

مى : اهلا بيك

مازن :ممكن نتكلم على الاميل

مى : لالالا مستحيل طبعا

مازن: ليه بس والله انا انسان كويس ولو عرفتينى مش هتندمى

مى: كلكم بتقولو كده

مازن: والله هتغيرى رايك

مى : اوك الاميل اهوه

مازن : اشطه شكلها وقعت

مى: انت بقى مرتبط ولا لاء؟

مازن : ههههه مرتبط ايه بس لاء طبعا طيب وانتى

مى : انا مش بفكر اصلا فى الارتباط ده

مازن : ليه بس دا الحب جميل

مى: لاء انا بخاف منه

مازن: علشان مجربتوش بس لو جربتيه هتلاقيه لذيذ وبقى مازن ومى يتكلمو كل يوم لمده شهر

مازن : ازيك يا مى وحشتينى

مى : وانت كمان

مازن بصى بقى انا هطلب منك طلب وياريت متكسفنيش

مى: طلب ايه

مازن: عاوز اشوف صورتك

مى: لاء مينفعش يامازن

مازن علشان خطرى دقيقه وحده بس على الاقل اعرف شكلك

مى: اوك بس هيا دقيقه

مازن: ميرسى يا مى يلا بقى ورينى

مازن : ايه ده دى قمر ... انتى قمر اوى يا مى

مى: ميرسى يامازن انا هشلها بقى

مازن: لاء استنى

مازن: اشطه انا هاخد الصوره برنت اسكرين علشان اوريها للواد كريم علشان يعرف قدراتى

مى: يامازن انت روحت فين انا هشيل الصوره

مازن : اوك خلاص هعمل تلفون وجاى

مى :اوك

مازن: الو ايوه ياكريم تعالى البيت ليه حالا

كريم: فى ايه يابنى

مازن : تعالى بس مفاجاه

كريم : اوك انا جيلك

مازن : شوف يامعلم وقولى رايك

كريم: مين دى ياض الله يخرب بيتك

مازن: دى مى بكلمها على النت

كريم : جامده اوى

مازن : علشان تعرف بس يابنى اخوك جامد

كريم : ممكن متكونش صورتها وتكون بتشتغلك وممكن اصلا متكونش بنت ويطلع ولد وانت واخد على كده اصلا

مازن: طيب انا هثبتلك

مازن: مى الوووو انتى فين

مى : موجوده

مازن : بس انتى بجد زى القمر

مى : ربنا يخليك بس ليه عندك طلب

مازن: اامرى

مى: احلفلى انك مخدش الصوره

مازن: لاء مخدهاش والله ماخدتها

كريم : اه ياكذاب وبتحلف بالله

مازن: ياعم هصوم 3 ايام

مازن: ممكن طلب كمان يا مى انا عارف انى رخم شويه

مى: لاء يامازن متقولش على نفسك كده بجد انا مستريحالك اوى

مازن: بجد كده بقى انا هتشجع انا عاوز رقم تلفونك نفسى اسمع صوتك

مى: مش عارفه اقولك ايه بس انا بثق فيك

مازن: متقلقيش والله يا مى محدش هيعرفه والله

مى: اوك خد الرقم اهوه

مازن: اشطه ياكريم انا هتصل بيها

كريم: استنى ياض شغل الميك

مازن: حاضر .... الو مى

مى: ايوه يامازن ازيك

كريم : دى صوتها جامد اوى

مازن : اسكت يابنى الله يخرب بيتك

مى: انت فى حد جمبك ؟

مازن : انا لاء اه لاء دا التلفزيون

مى: طيب انا هقفل بقى مش انت سمعت صوتى

مازن: متخليكى شويه انتى مكسوفه

مى : بصراحه يامازن اه انا والله عمرى ماكلمت ولد

مازن: ودا الى عجبنى فيكى انى اول واحد فى حياتك

مى : انا هقفل بقى باى

مازن : باى

كريم : اشطه يامعلم شكلها كده معجبه بيك

مازن : علشان تعرف بس

كريم : اطلب منها بقى انك تقبلها علشان تتاكد من الشكل

مازن : اتقل شويه مش بسرعه كده

كريم: ياواد انت يامخلص بس متنساش اخوك

مازن: عيب عليك هظبطك

وفات شهر كمان ومازن ومى لسه بيتكلمو لغاية مافى يوم طلب مازن من مى انه يشوفها

مازن: مى انا بجد جوايا حجات كتيره وعاوز اقولك عليها

مى: قول يامازن انا هسمعك

مازن : لازم اشوفك

مى: تشوفنى لاء ماينفعش

مازن: ليه بس يامى النت والتليفون مش كفايه ارجوكى انا لازم اشوفك

مى: طيب سبنى افكر شويه

مازن: ياه هوه انا مش فارق معاكى للدرجه دى كنت بحسبك عاوزه تشوفينى انتى كمان

مى: والله مش قصدى انا نفسى اشوفك فعلا بس خايفه

مازن: تخافى من ايه بس انا والله عمرى ماهعملك حاجه وحشه صدقينى

مى: خلاص يامازن انا موافقه

مازن: بجد يا مى انا مش مصدق

مى: لاء صدق يوم الاربع كويس

مازن: الاربع ياه لسه يومين بس مش مهم هستنى

مى: احمد ربنا انى وفقت ومش هقعد معاك غير 5 دقاياق

مازن: كفايه بس انى اشوفك حتى ولو دقيقه انتى متعرفيش انتى بالنسبالى ايه

مى: مش عارف يامازن خايفه اوى

مازن : خايفه منى

مى: لاء خايفه من حاجه تانيه حاجه جوايه عماله تزيد ومش عارفه فى ايه

مازن: وانا كمان على فكره بس عاوز اكد احساسى ومش هيتاكد غير لما اشوفك

مى: المقابله دى هتحدد حجات كتير

وجه اليوم الموعود يوم الاربع

مازن : انتى مى ؟

مى: ايوه ازيك يامازن

مازن: مش ممكن انتى احلى من الصوره الف مره انتى جميله اوى

مى: ربنا يخليك وانت كمان عسول

مازن: دا من زوقك يلا نقعد

مى: فى حاجه مهمه عاوز اقولك عليها

مازن : قولى

مى : انا .................

انتظروناقريبـــــا عشان نشوف مى قالت ايه لمازن

انا ايه هتسبنى ، يعنى انا اقعد ساعة اقرأ فى هذا الموضوع وبعدين انت تكمله نقط ، لو سمحت كمل؟؟؟؟؟؟؟؟ مستنية اعرف مى ايه؟؟؟؟؟؟؟؟؟؟؟؟؟ ومش حشكرك لغاية ما تكمل حضرتك الموضوع

هههههههههههههههههههههههههههههههههههههههههههههههههههههههههههههههههههه
منك لله يا حتسبنى انا اشتديت اوى للموضوع وعينى وجعتنى من القرايه وعماله بفكر bnn

ايه بعد كده
بقولك ايه لازم تكملها بقىىىىىىىىىىىىىىىىىى حنستنى بقتها

مشكورين على المرور بس الجزء التانى فى الفرن ينفع اجيبه قبل ما يستوى

هحاول اعلى النار شوية

السلام عليكم
من غير مقدمات نبدء الحلقه كنا انتهينا عند الجزء ده
مازن: دا من زوقك يلا نقعد
مى: فى حاجه مهمه عاوز اقولك عليها
مازن : قولى
مى : انا .................
(فتاه النت)
الحلقه الثانيه
مى: فى حاجه مهمه عاوزه اقولك عليها

مازن: قولى فى ايه
مى: انا يامازن عمرى ماحبيت ولا فكرت انى احب بس بصراحه لما اتكلمت معاك وعرفتك مش عارفه ايه الى حصلى
مازن: وانا كمان انا من يوم ماعرفتك وانا متغير انا بحبك
مى: بتقول ايه بتحبنى
مازن: ايوه بحبك ايه الغريب فى كده
مى : ازاى حبتنى من غير متعرفنى دى اول مره نشوف بعض فيها
مازن: عندك حق بس انتى يمكن فاكره كده لكن انا حاسس انى اعرفك من زمان
مى: مش عارفه اقولك ايه بس انا شايفه اننا ندى لبعض فرصه نتعرف فيها اكتر
مازن: الى تشوفيه مع انى واثق من احساسى
كريم : ايوه يابنى انت فين
مازن : اسكت ياض كنت لسه مع مى دلوقتى انت فين
كريم : انا على الكافى شوب
مازن: طيب انا جيلك سلام
كريم: احكيلى ياعم ايه الى حصل
مازن: البت جامده اوى ياكريم احلى من الصوره كمان
كريم: اشطه صحبتها ياعنى
مازن: ياعم صحبت مين دا انا قولتلها انى بحبها
كريم : وانت بتحبها فعلا
مازن: احب مين يابنى انت عبيط دا واحده بتاعت نت ياعنى اتسلى معاها شويه وبعد كده اشوف غيرها
كريم: حرام عليك والله مش جايز تطلع بنت كويسه
مازن: كويسه ههههههه انت اهبل والله فى واحده كويسه تقابل واحد كل الى بينه وبينها كلام على النت
كريم: مش جايز هيا وثقت فيك فعلا علشان كده قبلتك
مازن: فى ايه يابنى مالك كده فجاه نزل عليك طيبه انت ايه الى حصلك
كريم: مفيش بس البت صعبانه عليه
مازن: ميصعبش عليك غالى استنى بتتصل اهيه
مى: الو ازيك يامازن
مازن: ازيك ياحبيبتى
مى: حبيبتى
مازن: انا اسف شكلك زعلتى
مى: لاء بس اتكسفت شويه
مازن: المهم انتى اخبارك ايه
مى: انا كويسه وكنت بتصل بيك علشان اتطمن انك وصلت
مازن: اه دا انا فى البيت دلوقتى وهفتح نت كمان ساعه علشان اخويا قاعد على الجهاز
كريم : اه ياكذاب قولها انك بتشيش
مى : طيب انا هقفل دلوقتى باى
مازن : باى ياحبيبتى
كريم: حرام عليك يامازن والله حرام عليك شكلها غلبانه
مازن: دماغى ياكريم انا هروح بقى علشان اكلمها
كريم: لا حول الله الواد دا مش هيجبها لبر
مازن: هاى ازيك يامى
مى: ازيك يامازن
مازن: على فكره انا فرحان اوى
مى: ربنا يسعدك دايما بس ايه السبب
مازن: انتى السبب انا حاسس انك احلى حاجه فى حياتى
مى: ربنا يخليك على فكره يامازن انت انسان طيب وتستاهل كل خير
مازن: بس انا حاسس انك مش بتبدلينى نفس الشعور
مى: مازن انا بجد خايفه بحاول امنع نفسى ومش عارفه خايفه اضعف
مازن: خايفه من ايه بس انا بجد بحبك
مى : بص يامازن انا منكرش انى مستريحه ليك وانى مشدوده ليك اوى بس مش
مازن: سيبى نفسك خالص ومتخليش فى علاقتنا قيود
مى: اوعدنى يامازن انك تحافظ عليه
مازن: طبعا هحافظ عليكى وعمرى ماهزعلك حد يزعل روحه
مى: ربنا يخليك ليه ياحبيبى انا اسفه
مازن: حبيبى ايه قوليها كده تانى
مى: خلاص يامازن انا مش عارفه الكلمه دى طلعت ازاى
مازن: طلعت من جواكى لانك حساها انا اسعد انسان فى الدنيا
مى: وانا كمان فرحانه مش عارفه ليه
مازن: انا عاوز اصرخ واقول للدنيا كلها انى بحبك
مى: اعقل يامازن
مازن: طيب ونبى نفسى اسمعها منك علشان خطرى
مى: بحبك
مازن: لاء دا كتير عليه انا مش مصدق
مى: لاء صدق انا بجد بقولها من قلبى
مازن: ايه ده النور قطع ايه الحظ ده دا وقته ومين الى بيتصل دا كمان كريم
كريم: ايوه يامازن بتعمل ايه
مازن : كنت بكلم البت مى والنور قطع وكنا سخنا اوى
كريم : ايه الى حصل
مازن : قالتلى بحبك يامعلم والامور ماشيه تمام
كريم: عاوز اسالك سؤال وتجاوب عليه بصراحه
مازن: قول ياعم
كريم: افرض البنت دى كانت حبتك بجد هتعمل ايه
مازن : ولا حاجه هما كام شهر وبعد كده اسيبها واشوف غيرها
كريم: دا كتير اوى بجد حرام عليك يااخى
مازن: فى ايه ياكريم انت مالك اليومين دول منتا بتعمل كده برده
كريم: ايوه بس قرفت من نفسى وتعبت حرام الى احنا بنعمله ده ذنبهم ايه اقفل يامازن انا متدايق سلام
مازن: كريم انت يلا الواد اتجنن مش عارف ايه اللى حصله يكون الواد ...........

انتظرونا لتكمله القصه

ايه حكاية النقط دى ......... ممكن حضرتك تكمل القصة كلها على بعضها ولا فى مانع عند سيادتك ده بعد اذنك يعنى ومشكور

ههههههههههههههههههههههههههههههههههههههههههههههههههههههههههههههههههههه
ضى اتشدت اوى للقصه وبصراحه انا كمان
هى كم حلقه بالظبط بقى
بس بجد قصه حلوووووووه اوى بجد يا هتسبنى مرسيه ليك bnn

لا تحكمى يالىلى الى ان نعرف نهاية القصة لآخرها صح ..... بعد اذنك هتسبنى بجد ممكن تكملها للنهاية وشكرا لك

مشكورة علي القصة سلمت اديك نيس تو بيك aqqq

مشكورين على المرور والقصه تلت اجزاء

حرام بقى كملها عاوزه اعرف هيحصل ايه

حاضر جارى التحضير

الحلقه الاخيره من قصتنا

مازن: كريم انت يالا يكونش الواد اتجنن بس فعلا عنده حق انا لازم اوقف الحكايه دى

مازن : الو ازيك يامى

مى : غريبه اول مره تقوليى ازيك يامى علطول كنت بتقوليلى ياحبيبتى فى ايه

مازن : لاء مافيش انا لازم اشوفك دلوقتى

مى : مالك يامازن فى ايه

مازن: مافيش انا هكون فى المكان الى بنشوف بعض فيه كمان ساعه متتاخريش سلام

مى: ياترى فى ايه مش عارفه ليه حاسه ان فى حاجه لالالا اكيد مافيش حاجه ممكن يكون مضايق شويه

الغريب ان مى كان جواها حاجه بتقولها النهايه والله كانت حاسه بس فضلت تكدب احساسها لغايت ماراحت وشافته

مى: مالك يامازن قلقتنى عليك

مازن : تقلقى عليه انا الى زى ميتقلقش عليه

مى: ليه بتقولى كده

مازن : علشان انا حيوان

مى: متقولش على نفسك كده انت احسن واحد فى الدنيا انت حبيبى

مازن : كفايه بقى فوقى لحد امتى هتفضلى كده انتى كنتى لعبه فى ايد انسان قذر معندوش قلب ولا احساس

مى: مازن فى ايه انا مش فاهمه حاجه

مازن : بصى يامى انا كنت بضحك عليكى طول الفتره دى انا مبحبكيش انا كنت متراهن عليكى مع واحد صا حبى بس زى ماتقولى كده اللعبه طولت لانها احلوت شوفتى ازاى انا حيوان فى عز ماانتى كنتى بتحبينى وبتعملى اى حاجه علشان تسعدينى انا فى نفس الوقت كنت بقتلك كنت بجرحك وانتى هنا لازم تفوقى

مى: لالالا انت بتضحك عليه انت بتختبر حبى وانا والله بحبك انا عارفه انك بتضحك عليه

مازن : كفايه ارجوكى انا عمرى ماهسامح نفسى على الى عملته انسينى لانك تستاهلى احسن منى انا وحش اوى ...........

وقام مازن مشيى ومى لسه قاعده علشان مش قادره تقوم مش قادره تكلم حد مش قادره تبكى بس جواها بتصرخ بتقول فى ايه الى انا سمعته ده حقيقى ولا انا بحلم معقوله فى كده معقوله قصه الحب خلصت مشيت مى فى الشارع وهى فى حاله جنون بتوقف الناس فى الشارع بتقولهم مازن سبنى وجتلها شيماء بسرعه واحده صاحبتها اتصلت بيها وعرفت هى فين

شيماء : اهدى خالص ومش عاوزاكى تحكيلى ايه الى حصل اهم حاجه انك تهدى

مى : مازن سبنى يا شيماء كان بيضحك عليه

شيماء: شوفى انا مش هقولك اى حاجه لان اى كلام اقوله مش هيفيد لكن لازم تهدى علشان خطرى

مى : روحينى البيت ياشيماء

شيماء: الووومازن

مازن : ايوه ياشيماء ازيك

شيماء: انت ايه انا مش لاقية كلام اقوله ليك انت انسان حقير معندكش قلب ولا احساس عملت فيك ايه ليه تعمل معاها كده دى بتحبك بجد منك لله ياشيخ

وقفلت شيماء المكالمه على كده وفضلت جمب مى تحاول تخرجها من الازمه مقدرتش وبعد 6 شهور خرجت مى لوحدها من الازمه بس خرجت انسانه تانيه بقى كل همها فى الحياه انها تجرح اى حد حوليها انها تعمل فى اى حد زى مااتعمل فيها محدش قدر يوقفها ظلمت كل الى حواليها وضيعت ناس كتير بدافع الانتقام
___
وبكده خلصت حكايتنا انا عارف انها انتهت بكميه احزان كبيرة لكن الحزن دا ليه هدف للبنات يارب يفهموه ويتعظو

هى النهاية حزينة فعلا ومؤلمة كمان ، بس فعلا فيها عظة وعبرة لكل البنات حتى لا يقعوا ضحية مثل مى ،مشكور هتسبنى بجد للنصيحة والتوعية وجزاك الله كل خير

دنيااااااااااا الاحزان
القصة حلوة قوى حتسبنى بجد بس عندى سؤال ياعنى لازم يكون دهول البنت النت للحب مش ينفع يكون فى صداقة حقيقة ارجود رد عليه

يا خساره ......... مكنتش اتخيل نهايه القصه تبقى كده
ايه ذنبها مى ذنبها انها حبت بجد وكانت بريئه جدا فى حبها فى زمن مفهوش حب؟؟
ولا ذنبها انها صدقت انسان مش يستاهل ؟؟؟؟؟؟
بس بجد عدم الثقه دى بتولد حاجات كتير وممكن يكون انتقام ودى بيبقى غصب عنها
تبقى عاوزه تجرح لكن متتجرحش
ياترى ايه ذنبك يا مى ؟؟؟
مرسيه ليك هتسبنى بجد bnn

يااااااااااااااااااااااااااااااااااااه قصه حلوه اوى بس حرام اللى حصل فى مى بس هى الغلطانه عشان صدقت ولد
بس هى مش كانت عارفه ربنا يستر على البنات

ميرسى اوى يا ميدووووووو بس انت زلتنا عقبال ما قولتها

مشكورين على المرور كان لازم القصه تبقى جزء جزء عشان الرساله توصل صح
لى لى بتقول ان مى حبت فى زمن مفيهوش حب مين اللى قال كده لسه فى حب طاهر وحقيقى لكن ممكن نقول قل مشكورة على المرور يا جميل
اللى حصل لمى دا مش نتيجه انها صدقت ولد زى ما بتقولى يا انا اسفه اذا فى يوم حبيتك
لكن نتيجه لانها كانت ماشيه طول القصه بقلبها ولغت عقلها لو فى مره شغلت عقلها مكنتش هتوصل لدا كله
ومش معنى كده انى بدافع عن الشاب لكن كل اللى بحاول اوصله ان لازم نشغل عقولنا كويس اوى عشان منوصلش للى وصلت ليه مى اننا ننتقم من شخص فى صورة اشخاص تانيين ملهمش ذنب

]

دنيا الاحزان كتب:: دنيااااااااااا الاحزان
القصة حلوة قوى حتسبنى بجد بس عندى سؤال ياعنى لازم يكون دهول البنت النت للحب مش ينفع يكون فى صداقة حقيقة ارجود رد عليه

اكيد مش لازم لكن دا بيتحدد من الهدف اللى داخله بسببه البنت النت هل هيا داخله تحب ولا داخله تدور على اخوات ولا داخله تدور على اصدقاء

وكل الامثلة دى موجوده وانا هتكلم عن نفسى ليا اخوات واصدقاء بنات على النت وفى منهم هنا على المنتدى والعلاقه بينا اكتر من اخوات كمان ومش كلام بس لاء فعلا لما بتفهمو بعض كويس بتحسو انكم اخوات بجد

اما بقا بالنسبه للشباب فا انا عرفت شخص على النت وقابلته فى الحقيقه يعنى العلاقه اتحولت هنا من معرفه على النت لحقيقه ووالله العظيم انى بعتبره اخويا التالت وهوه كمان
نهايه الكلام وانتى داخله النت لازم تكونى عارفه انتى عاوزه ايه وهتلاقى كل حاجه على الشبكة العنكبوتية حلوه الشبكة العنكبوتية دى لو داخله تدورى على حب هتلاقى لو داخله تدورى على اصدقاء هتلاقى لو داخله تدورى على اخوات هتلاقى بس لازم تكونى مركزة فى الاول عشان متختاريش غلط

والله القصه جميله يا هتسيبنى وفعلا لازم اى بنت تخلى بالها من دخولها على النت ومش تقع كده على طول زى مى وعلى رايك الى عاوزه تحب من النت حتلاقيه والى عايزه اصدقاء واخوات حتلاقيه وانا فعلا ليا اخوات واصداقاء من النت وبعزهم جدا مشكور بجد كتير هتسيبنى وانا استنيت للاخر عشان ارود ويارب البنات تخلى بالها اوى اوى اوى من العلاقات على النت ومش تعمل زى مى وربنا يسترنا اجمعين يارب bnn

» موضوع: قصة مخيفة ومحزنة (النت)
» لو لاقيتي صورتك ع النت ؟
» النت فى الجاهليه 00000
» انواع الشباب على النت
» شاب ينشر صورة اخته على النت