نوسه: ماليش دعوه عاوزه اتجوز عمر انا بحبه وهو بيحبنى واتفقنا على كل حاجه
اشمعنى انا اللى ما اتجوزش ماهى ماهى بنت طنط دريه اتجوزت الاسبوع اللى فات من من د.تامر وعملوا فرح كبير واهم طلعوا شهر العسل فى تايلاند مليش دعوه انا عايزه اروح تايلاند انا و عمر
ابو نوسه:مين بتقولى اية
نوسه:بقولك عايزه اتجوز عمر واسافر تايلاند اشمعنى انا انا وهو اتفقنا على الجواز وهو بيكلم مامته وباباه دلوقتى هو لسه مكامنى من شويه وقال انه هيكلمهم
ابو نوسه :وايه كمان يا نوسه
نوسه:هو هيجيب لى فستان ابيض احلى من بتاع فيفى بنت طنط منيره اللى ماما كان عجبها وكانت بتقول انه احلى من الفستان اللى جبتهولها فى الفرح واللى كنت مستخسر تدفع فيه الفلوس
ابو نوسه:مين قالك الكلام ده
نوسه :ماما وهى بتكلم تيته قالتلها الكلام ده وقالت انت كنت مستخسر تدفع الفستان وانت وتيته ليه ؟ وانت بتهرب من الموضوع ليهعمكر يجى امتى علشان يطلب ايدى
ابو نوسه: الشمال والا اليمين
نوسه :هى هتفرق
ابو نوسه:هو مين عمر ده وعرفتيه ازاي
نوسه: عمر ده زميلى واكبر منى باربع شهور بس علشان ماتقوليش فى فرق سن وهنجوز ونكمل سوا انت عايزنى اعنس انا عايزه افرح بولادى ويكبرو وانا لسه صغيره
ابو نوسه: يا سلام انت بتجيبى الكلام ده منين
نوسه:بجيبه من بقى هو عمر عيبه ايه باباه ومامته اشتروا الشقه خلاص مش ناقص غير اننا نروح نشترى العفش
ابو نوسه: كمان اشتروا الشقه من الدلوفتى
نوسه:يا سلام بيجهزوا لابنهم زي ما ماما بتجهزلى
ابو نوسه:هى امك بتجهز لك
نوسه: اه ماما بدات تجهزلى من دلوقتى انا سمعاها وهى بتقول لتيته الكلام ده وجابت طقم صينى امبارح وعاينه عند تيته
ابو نوسه: الله الله اشجينى يا نوسه
نوسه: سيبك من ماما دلوقتى اقول لعمر يجى امتى
موبيل نوسه بيرن وتدخل البلكونه
نوسه: ايوه يا عمر يا حبيبى انا بقول لبابا دلوقتى ومش راضى يقولى تيجوا امتى هما قالولك هيجوا امتى
عمر : ماحدش راضى يرد عليا ومسخسخين على نفسهم من الضحك
نوسه:هما شكلهم مش عايزين يجوزونا
عمر : خلاص يا حبيبتى نتجوز عرفى فى الفسحه واصحبنا هما الشهود
نوسه :خلاص ياحبيبى انا هاجيب الفستان الابيض اللى بتاع ماما اللى بابا كان مستخسر يدفع فيه الفلوس بس كبير شويه مش مشكله هبقى اشوف حل فيه
عمر :وانا هجيب البداله الجديده اللى بابا جابهالى
ملحوظه
نوسه عندها اربع سنين وعمر اربع سنين واربع شهور
عقبال عندكو اتجوزا فى الفسحه والمهر كان مصروف وباكو شكولاته ووزعوا على اصحابهم مصاصة
تحياتى
موضوع: وضوع: انا عايزه اتجوز 
الثلاثاء يوليو 15, 2008 1:48 am
